الجمعة 02/مايو/2025 - 09:00 ص

استغاثت رانيا مصطفى، شقيقة الشاب أحمد مصطفى، أحد المصابين في حادث انفجار خط الغاز بطريق الواحات، بعد تدهور حالته الصحية بسبب الحريق حيث تم نقل المصاب مستشفى الشيخ زايد ثم مستشفى إمبابة.

وقالت رانيا في استغاثتها: حادث انفجار الغاز اللي حصل من كام ساعة، أحمد أخويا كان من ضمن اللي شغالين هناك، نقلوه الأول مستشفى الشيخ زايد وبعدين اتنقل مستشفى إمبابة لأن عدد المصابين كتير، مش 11 زي ما بيتقال، ولسه في مصابين أهاليهم ميعرفوش.

انفجار خط غاز طريق الواحات 

وأكدت أن حالة أحمد حرجة، قائلة: حالة أحمد أقل بكتير من حالات تانية، ربنا يتم شفاهم على خير، ومعظمهم لسه شباب، قائلة: أحمد أخويا كان رايح دعم يوقف الحفر ويبعد الناس عن مكان الغاز، وللأسف ملحقش.

وكشفت رانيا لـ القاهرة 24، أن شقيقها يحتاج لرعاية، قائلة: مكلمناش مستشفيات، إحنا من المتميز 6 أكتوبر، وأحمد شغال مع مقاول، جالهم إخباريه إن الحفر هناك خطر، فراح هو و٧ زمايله يوقفوا الحفر، دعم يعني، بس للأسف مجرد ما وصلوا كان شكمان عربية طلع شرارة نار وحصل اللي حصل.

واصلت رانيا: مفيش حد تواصل معانا من المستشفيات، إحنا عرفنا إن أخويا من ضمن الضحايا يوم الحادث الساعة 11 بالليل، ومكانوش عايزين يدخلوه المستشفى عشان لوحده.

تابعت: الأول كان في مستشفى الشيخ زايد وبعدين نقلوه مستشفى إمبابة العام، ودي غير متخصص للحروق أصلًا، وحرفيًا لا تنفع آدميين، أحمد مش لوحده من الحادث في المستشفى دي، معاه طفل اسمه سيف 17 سنة كمان.

وطالبت رانيا بقبول الاستغاثة وتحويل أحمد إلى مستشفيي متخصصة في الحروق، مؤكدة أنه تعمل علي نقله لمستشفى الناس.